Mä urux tiwulax wali manq’at awtjataw sarnaqaskatayna, ukhamaruw mä asnump jikisitayna. Asnurux akham satayna: –sinti manq’at awtjataw jikxatasta, jumarukïy manq’antxchïma, sasa. Uk ist’asax asnux mulla mullakiw uñnaqasitayna.

Ukat wäl lup’itayna –kunjamataks qhispïxa!, sasa. Ukat kayu usuchjataw tukutayna. Tiwulax asnur uñjasinx akham saw satayna: –kunats ukham kayu usuchatjam sarnaqta, sasina. Asnux sarakitaynawa: –kayujar mä lankhu ch’aphiw ch’aphintitu, añchapuniw jichhax usutu, sasa. Ukat asnux tiwular akhma saw achikt’asitayna: –amp quli jilata, uka ch’aph kayujat apst’uta, sasina. Ukat mask manq’s manq’antxakchitätaya, sataynawa.

Tiwulax uka llakit arunak ist’asax wal kusisitapuniw iyaw –sarakitayna. Ukhamax apsümaya, kawkis uka usuchat kayumaxa, aytasimay jank’aki, saw satayna. Ukat asnux kay aytasisinx mayak “p’aqx” sas tiwular lakapxat wakt’ayatayna; laka ch’akanakas willsut ukhamaw qamaqix uñjasitayna. Ukham mat’aqt’asax asnux walpun t’ijtawayxatayn –siya. Uka thujsa asnu, sasin tiwulax jiwirjamaw waq’aqt’asis mäk jaltxarakitayna.

Janiw kawkhans khitirus mäk ist’asinx iyaw sañäkiti, jan wali amtäwinakanïpxiriw siwa.

Por:Martin Canaviri Mamani