Tiwanaku markanxa, pä tunk mayan urunak saraqatatxa chinuqa (enero) phaxsitxa, uka ayllunkir jaqinakax wali jiwakpunw Evo mallkur uñtasax mä t’ixitx sayt’ayapxatayna.

Ericka Aroa ukankiw aka jamuqt’ataxa.

Aka jamuqt’atanxa uñjasiw mä t’ixitax Evo kipkaki, markachirinakaxa, wali munasiñampiw wali jacha chinuñanakamp chint’apxatayna, uka t’ixitax wali jach’apunitaynawa, pusi jaq sayt’a ukch’anawa. Veoxa, ukanak uñjasin wali k’uchikipunirtakinawa uküruxa.

Uka t’ixit uñjañkamaw jaqinakax jamuqt’ir sarapxäna, wila ñik’utan qara jaqinakasa, ch’iyar uynaqan jaqinakas ukjakamx sarapxarakitaynawa.

Maysatuqitx ukakipkarakiw kunayman isinakarux ajanupx apkatt’apxarakitayna:

Ericka Aroa ukankiw aka jamuqt’ataxa.

Tiwanak markarux isi aljirinakas puripxarakitaynawa, uka isinakax Evo mallkun ajanunkamakinäwa, saminakapax janqumpit laramampit samiñcht’atanawa, ukanak uñjasax jaqinakax wali alapxatayn ucht’asiñataki, ukampirusa, yaqhip isinakax Movimiento Al Socialismo (MAS) ukham chimpunt’atanawa, chikatanakax aymar wiphalan kuna.

=Ericka Aroa