Callamarca: Taqi chaqan arusamp saräwinakasamp waqaychapxañasa (We have to protect our diversity, language and culture in all parts of the world)

Posted June 15th, 2014 in Uncategorized by Elias Quispe Chura

Ilaies2012@gmail.com ELIAS QUISPE CHURA

Quebec, Canadá uksa jaya markan jakasir jilatanak kullakanakax arupx jach’anchayapxarakikiritaynawa; jupanakax niya taqi chaqan Francés arut arst’asipxi, sañäni: utana, yatiqañ utanakana, yatiyäwinakana, ukat juk’ampinakana.

Jupanakax Inklis arx yatisipkarakiwa, janiw ukjamak qhiphar jaytanukupkiti. Ukat kunapachatï uka arut aruskipt’añäk ukjaxa, jan kuna pächasisaw arst’apxaraki.

Canadá wayn tawaqunakamp aymar jila kullakanakampi Canadánkir tawaqunakax qurpachiripampiw jutapxatayna.

Ukatuqit kimsa wayn tawaqux akjam arst’apxi:

Mayni tawaqux aymaran “kayu, ampara” ukat yaqha arunakamp kun yatiqarakitayna, ukat jupax mäk’amppach yatiqan munarakïna. Ukaw pachpan jakasirinakar wal chuym llamkt’asiyäna.

Ukjarux Joëlle Vaillant yatichirix akjam arunakampiw juk’amp qhanancht’askaki:

1950, 1960 ukjanakax jichhürunakat sipan aspachaw tayka arup waqaychañatakix unxtasipxatayna, jichhax “literatura” ukaruw juk’amp ch’amanchayañ munapxaraki.

Aka uraqpachan wali uñt’at arupasa, jan ukax janis ancha uñt’atakpana, taqi aruw waqaychaña, ch’amanchaña ukat jach’anchayañ wakisi. Yamas jan ancha yäqatakch ukaxa, mayanakat sipan juk’amp juk’amp nayrar sartayatañapawa. Ukjamän ukjakiw laq’a achachilanakasan nayra kunayman yatiñanakapax jan chhaqkaniti.